മുതിര്‍ന്ന പെണ്‍കുട്ടികള്‍ പുക വലിക്കുന്നതിന്റെ പേരില്‍ ആറാം ക്ലാസുകാരിയുടെ മുടി മുറിച്ചതായി പരാതി.
കൊല്ലം നഗരത്തിലെ സ്‌കൂളിലെ പത്താം ക്ലാസ് വിദ്യാര്‍ഥിനികള്‍ക്കെതിരേയാണ് പരാതി. അന്വേഷണത്തിന്റെ ഭാഗമായി ജില്ലാ ശിശു സംരക്ഷണ സമിതി കുട്ടികള്‍ക്ക് കൗണ്‍സിലിംഗ് നല്‍കി.
ആറാംക്ലാസുകാരിയുടെ വാക്കുകള്‍ ഇങ്ങനെ…’ഓണപരിപാടിയുടെ ദിവസം ബാത്‌റൂമില്‍ പോയപ്പോള്‍ അവര്‍നിന്ന് സിഗരറ്റ് വലിക്കുന്നത് കണ്ടു. ഇതു കണ്ട് ഓടിയ എന്നെ ഓടിച്ചിട്ടു പിടിച്ച് പുറകിലേക്കു കൊണ്ടുപോയി. പിന്നീട് ക്ലാസില്‍ പോയി കത്രിക എടുത്തുകൊണ്ടു വന്ന് എന്റെ മുടി വെട്ടി. എന്റെ വയറ്റിലൊക്കെ കുറേ ഇടിച്ചു. ഇത് ആരോടെങ്കിലും പറഞ്ഞാല്‍ എന്നെ കൊല്ലുമെന്നും പറഞ്ഞു.’–കുട്ടി പറയുന്നു.
കൊല്ലത്തെ പ്രമുഖ ഗേള്‍സ് സ്‌കൂളിലെ ആറു പെണ്‍കുട്ടികളാണ് ശുചിമുറിയില്‍ സിഗരറ്റ് വലിച്ചത്.
ഇത് പുറത്തു പറയരുതെന്ന് ഭീഷണിപ്പെടുത്തിയാണ് ആറാം ക്ലാസുകാരിയുടെ ഇടതുവശത്തെ തലമുടി കത്രികകൊണ്ട് മുറിച്ചത്.
സ്‌കൂളില്‍വച്ച് പരാതിക്കിടയായത് നടന്നിട്ടുണ്ടെങ്കില്‍ നടപടിയെടുക്കുമെന്ന് സ്‌കൂള്‍ അധികൃതര്‍ വ്യക്തമാക്കി.
വിശദമായ അന്വേഷണത്തിലൂടെ മാത്രമേ വസ്തുത വ്യക്തമാകൂവെന്ന് ശിശു സംരക്ഷണ ഓഫീസര്‍ അറിയിച്ചു.
